IBSA Cüdo üzrə Qran-Pri yarışlarının ikinci günündə Azərbaycan daha çox medal qazanmağı hədəfləyib
Paralimpiya əfsanəsi İlham Zəkiyev Azərbaycanın medal qazana biləcək idmançıları sırasındadır. Milli komanda da öz növbəsində Bakıda keçirilən IBSA Cüdo üzrə Qran-Pri yarışlarının ikinci gününə hazırlaşır.
İkiqat Paralimpiya çempionu və altıqat Avropa çempionu +100 kq ağır çəki kateqoriyasında olan güclü bir rəqiblə qarşılaşacaq. Əgər Zəkiyev hazırki dünya çempionu iranlı Mohammadreza Kheirollahzadehi məğlub etməli olsa, onun öz təcrübəsinə və həmyerlilərinin tam dəstəyinə ehtiyacı olacaq.
-100 kq çəki kateqoriyasında Kamil Ağayev iştirak etdiyi ilk beynəlxalq yarışda Azərbaycan bayrağını dalğalandırarkən, -90 kq çəki kateqoriyasında Rövşən Səfərov və Ramin Əliyevin daha da irəliləyəcəyinə ümid edilir.
Səfərov hazırki Avropa çempionudur və 2016 Rio Paralimpiya Oyunlarında bürünc medal qazanmışdır. Beynəlxalq yarışlarda iştirak edərək çoxsaylı medallar qazanan 31 yaşlı atlet Azərbaycanın milli para-cüdo komandasının ən təcrübəli idmançılarından biridir.
Kişi atletlər kimi Azərbaycanın qadın cüdoçuları da yarışın ikinci günündə üç çəki kateqoriyası üzrə yarışacaqlar.
-63 kq çəki kateqoriyası üzrə 2017 Avropa Çempionatında qızıl medal qazanan və həmin ildə Qran Slam titulu əldə edən Xanım Hüseynova fəxri kürsüdə yer tutmaq ehtimalı yüksək olan idmançılardan biridir.Yalnız yeddi idmançının iştirak etdiyi bu kateqoriyada atlet ən yaxşı cüdoçulardan biri hesab olunan isveçli Nicolina Pernheim ilə qarşı-qarşıya gələcək.
Sambo üzrə beşqat dünya çempionu, 47 yaşlı Zülfiyyə Hüseynova ilk dəfə olaraq cüdo üzrə beynəlxalq yarışda iştirak edir. -70 kq çəki kateqoriyasında, zəngin təcrübəsi olan Hüseynovanın qarşılaşmasını yaxından izləməyə dəyər.
Azərbaycan milli komandasından +70 kq ağır çəki kateqoriyasında iki güclü atlet, Dürsədəf Kərimova və Xatirə İsmiyeva yarışacaq. Hər iki atlet ilk dəfə olaraq beynəlxalq yarışda iştirak edir və zəngin təcrübə əldə etməklərinə baxmayaraq onların fəxri kürsünün ən yüksək pilləsində yer tutmaq ehtimalı qeyri-müəyyəndir. Buna baxmayaraq, Heydər Əliyev adına İdman Kompleksində keçirilən yarışa gələn azərbaycanlı azərkeşlərin dəstəyi ilə hər şey mümkündür.
IBSA Cüdo üzrə Qran-Pri yarışlarının ilk günündə Azərbaycanın milli komandası ümumilikdə doqquz medal qazanıb. Kişi idmançılar beş, qadın idmançılar isə dörd medal qazanıb. Bura qızıl medal qazanmış Vüqar Şirinli, Sevda Vəliyeva və Şahanə Hacıyeva da daxildir.
35 ölkədən 212 atlet IBSA (Beynəlxalq Görmə Məhdudiyyətli İdmançılar Assosiasiyası) Cüdo üzrə Qran-Pri yarışlarında iştirak edir. Yarış Bakıda keçirilir və Azərbaycan Milli Paralimpiya Komitəsi tərəfindən təşkil olunub.